Mere Bachpan Mein

July 26, 2014

Sooraj ki pehli kiran jab parti thi aangan mein,
Subah ki dastak thi, maa ki choori ki khan khan mein,
Haathon mein akhbaar liye, chai ki chuski lete pitaji,
Haan aisi subah hoti thi, mere bachpan mein...

School ke liye jaana, woh adhoore mann se,
Par school mein parhai karna, poori lagan se,
Nayi sharaarat ko anjaam dena, poore tashan se,
Dushmano ka meri taraf dekhna, ek baar fir jalan se,
Haan aisi natkhat dopehar hoti thi, mere bachpan mein...

Raat ko pita ki ungli thaame, woh sayr par nikalna,
Woh pita ka kabhi ice-cream toh kabhi toffee dilaana,
Phir ghar aakar bhai-behno ke sath mil-baant kar khaana,
Phir nayi kahani sunte-sunte, sapno ki duniya mein kho jaana,
Haan aisi masti bhari raat hoti thi, mere bachpan mein...

- Simran Kankas
Views: 2946

Leave a Comment