Sapno Ki Manzil

May 3, 2014

Bachpan mein sochti thi kyun main jaldi bari nahi hoti,
Mera koi nahin toh kya, Kyun main kisi ki nahi hoti,
Khilone they haathon mein, magar sapne bunti thi,
Nahin jaanti thi ki sapno ki koi manzil nahi hoti...

Rishton ko samjhne ki koshish mein lagi rahi,
Par jab samjhne lagi, toh aur bhi tanha ho gayi,
Mera rona kisi ko sunta nahin tha,
ya main hi aansu chhupane lag gayi,
Mere liye mera sahara bane aansu, par kisi ke liye na ban paaye yeh moti,
Nahin jaanti thi ki sapno ki koi manzil nahi hoti...

Is duniya mein apni shakhsiyat banane nikli thi ghar se,
Thokar khayi par ruki bhi nahin kisi darr se,
Dil kehta ki ek hai isi duniya mein,
jo khoobsurat zindgi dikhayega apni nazar se,
Khush hoke fir bachpan ki tarah ghar ghar khela karti thi,
Nahi jaanti thi ki sapno ki koi manzil nahi hoti...

Dil ko aahat bhi nahin hui, par usne kaha main aa gaya,
Bina mujhe jaane, mera humsafar ban gaya,
Uske peechhe chal di main,
aur woh bina hath thaame raasta dikhata gaya,
Door nikal gaya woh kahin ,aur main beech rah tanha khari thi,
Nahi jaanti thi ki sapno ki koi manzil nahi hoti...

Chhor chuki thi jab sab ummedein, toh kisi ki awaaz pari kaano mein,
Peechhe mur ke dekha, toh who chehra saamne tha, jo dikhayi deta tha sapno mein,
Usne is tarah se gale lagaya apne,
Jaise hamesha mehfooz rakhega apni baahon mein,
Dil ki dharkan suni uski, tab se usi ke dil mein raha karti thi,
Nahi jaanti thi ki sapno ki koi manzil nahi hoti...

Dheere dheere ehsaas hua, ki us ke dil mein sirf mera hi ghar na tha,
Aur bhi they kayi, jinka wahan basera tha,
Ghabra gayi un sab ke chehre dekhke,
Jise samjha tha apna ghar, woh duniya ka dera tha,
Ek baar fir aaj main milti hun, tanhayi ki apni mehfil sajati,
Nahi jaanti thi ki sapno ki koi manzil nahi hoti...

- Simran Kankas
Views: 1421

Leave a Comment